జగ్గారెడ్డి సంచలన ప్రకటన… కన్ఫ్యూజ్‌ కావొద్దంటున్న జగ్గారెడ్డి!!!

 

 సోమవారం సంచలన ప్రకటన చేస్తానని మీడియా ముఖంగానే చెప్పారు కాంగ్రెస్‌ ఎమ్మెల్యే జగ్గారెడ్డి. బండకేసి కొడతానని రేవంత్‌ రెడ్డి చేసిన వ్యాఖ్యల నేపథ్యంలో జగ్గారెడ్డి ఎలాంటి ప్రకటన చేస్తారనే ఉత్కంఠ అందరిలో కనిపించింది. ఏం చెబుతారా? అని అంతా ఉత్కంఠగా వింటుండగా.. ప్రస్తుతం తాను ఎవరిపై ఎలాంటి వ్యాఖ్యలు చేయనని అన్నారు మొన్నటి వ్యాఖ్యలపై నో కామెంట్స్ అన్న జగ్గారెడ్డి.. సంచలన ప్రకటన ఏముంటుందనేది సమయమే డిసైడ్‌ చేస్తుందని చెప్పారు. తాను కాంగ్రెస్‌ లోనే ఉంటానని స్పష్టం చేశారు. అలాగే కాంగ్రెస్‌ ను అధికారంలో తీసుకొస్తామన్నారు. పార్టీలోని పరిణామాలను వివరించేందుకు సోనియాను కలుస్తామని తెలిపారు. తాను ఏం మాట్లాడినా కాంగ్రెస్‌ మంచి కోసమేనని వ్యాఖ్యానించారు.

పార్టీలో ఉంటానా పోతానా అనేది మనసులో నుంచి తీసేయాలన్నారు జగ్గారెడ్డి. కాంగ్రెస్ నాయకులు తన వ్యాఖ్యలను నెగెటివ్‌ గా తీసుకోవద్దని చెప్పారు. పార్టీ లైన్‌ లోనే ఉంటానని.. ఎక్కడికీ పోనని స్పష్టం చేశారు. ఒకవేళ తాను పోవాలి అనుకుంటే ఆపేదెవరు? అంటూ వ్యాఖ్యానించారు. తన స్టేట్‌ మెంట్లతో ఎవరూ కన్ఫ్యూజ్ కావొద్దని.. తాము తిట్టుకోవడం వ్యూహమే అనుకోవాలన్నారు. రేవంత్, తాను గొడవ పడేది ఎత్తుగడనే అనుకోవాలని చెప్పారు.

మరోవైపు బీజేపీ కార్యవర్గ సమావేశాలతో తెలంగాణకు ఒరిగిందేమీ లేదని ఆరోపించారు. ఎలాంటి తీర్మానాలు లేకుండా సభ ముగించేశారని ఎద్దేవ చేశారు. బండి సంజయ్ పాదయాత్రలో ప్రజలకు ఏ హామీలు ఇస్తారని ప్రశ్నించారు. బీజేపీ నేతలంతా డబుల్ ఇంజన్ అని మాట్లాడుతున్నారని.. ఉన్న సింగిల్ ఇంజనే సరిగ్గా పనిచేయడం లేదని విమర్శించారు జగ్గారెడ్డి