అన్ని మతాల ఆచారాలు, సంస్కృతులను తెలంగాణ రాష్ట్ర ప్రభుత్వం గౌరవిస్తుంది మంత్రి తలసాని శ్రీనివాస్ యాదవ్.

తెలంగాణ దశాబ్ది ఉత్సవాలలో భాగంగా  బుధవారం సికింద్రాబాద్ లోని శ్రీ ఉజ్జయిని మహంకాళి అమ్మవారి ఆలయంలో ఆధ్యాత్మిక దినోత్సవాన్ని నిర్వహించారు. ఈ సందర్భంగా మంత్రి అమ్మవారిని దర్శించుకొని ప్రత్యేక పూజలు నిర్వహించారు. అనంతరం ఆలయంలో లోక కళ్యాణార్ధం నిర్వహించిన శాంతియాగం, చండీహోమం పూర్ణాహుతి లో పాల్గొన్నారు. ఆలయం ఆవరణలో మొక్కలను నాటారు. ఈ సందర్భంగా మంత్రి మాట్లాడుతూ తెలంగాణ రాష్ట్రంలో ప్రధానంగా హైదరాబాద్ నగరంలో వివిధ భాషలు, వివిధ ప్రాంతాలకు చెందిన ప్రజలు నివసిస్తున్నారని చెప్పారు. తెలంగాణ రాష్ట్రం ఏర్పడిన తర్వాత ముఖ్యమంత్రి శ్రీ కల్వకుంట్ల చంద్రశేఖర్ రావు  ఆదేశాల మేరకు బోనాలు, గణేష్ నవరాత్రులు, రంజాన్, క్రిస్మస్ తదితర పండుగలను  ప్రభుత్వం ఆధ్వర్యంలో ఎంతో ఘనంగా నిర్వహిస్తున్న విషయాన్ని గుర్తు చేశారు. ఆలయాలు, మసీదులు, చర్చి ల అభివృద్ధి కి అవసరమైన నిధులను ప్రభుత్వం అందిస్తుందని చెప్పారు. బల్కంపేట ఎల్లమ్మ కళ్యాణానికి లక్షల మంది భక్తులు వచ్చారని, ఎలాంటి ఆటంకాలు కలగకుండా ప్రభుత్వం అన్ని ఏర్పాట్లు చేసినట్లు పేర్కొన్నారు. తెలంగాణ రాష్ట్ర సంస్కృతికి  ప్రతీకగా నిలిచే ఆషాడ బోనాల ఉత్సవాలు ఈ నెల 22 నుండి ప్రారంభం కానున్నాయని,  ఈ ఉత్సవాలకు వివిధ ప్రాంతాల నుండి పెద్ద సంఖ్యలో వస్తారని, అందుకు తగినట్లు వివిధ శాఖల ఆధ్వర్యంలో అన్ని ఏర్పాట్లు చేస్తున్నట్లు వివరించారు. బోనాల ఉత్సవాలను తెలంగాణ రాష్ట్రం ఏర్పడిన తర్వాత ముఖ్యమంత్రి కేసీఆర్ రాష్ట్ర పండుగగా ప్రకటించారని చెప్పారు. మన పండుగలు నేడు దేశ విదేశాలలో జరుపుకోవడం మన అందరికీ గర్వకారణం అన్నారు. అంతేకాకుండా రాష్ట్రంలోని అనేక దేవాలయాలను  ప్రభుత్వం  అభివృద్ధి చేసిందని అన్నారు. సుమారు 1200 కోట్ల రూపాయల వ్యయంతో  చరిత్రలో నిలిచి పోయే విధంగా యాదాద్రి ఆలయాన్ని నిర్మించినట్లు తెలిపారు. ఈ కార్యక్రమంలో దేవాదాయ శాఖ అసిస్టెంట్ కమిషనర్ కృష్ణ, EO మనోహర్ రెడ్డి, మాజీ కార్పొరేటర్ అత్తిలి అరుణ గౌడ్, ఆలయ కమిటీ సభ్యులు తదితరులు పాల్గొన్నారు

 

కన్నుల పండుగగా బల్కంపేట ఎల్లమ్మ అమ్మవారి కళ్యాణం

బల్కంపేట ఎల్లమ్మ అమ్మవారి కళ్యాణం మంగళవారం కన్నుల పండుగగా నిర్వహించారు. రాష్ట్ర ప్రభుత్వం తరపున మంత్రి తలసాని శ్రీనివాస్ యాదవ్, స్వర్ణ దంపతులు పట్టు వస్త్రాలను సమర్పించారు. ముందుగా మంత్రి దంపతులకు ఆలయ  పండితులు పూర్ణ  కుంభంతో స్వాగతం పలికారు. అమ్మవారికి వస్త్రాలు సమర్పించిన అనంతరం ఆలయంలో ప్రత్యేక పూజలు నిర్వహించారు.  వివిధ ప్రాంతాల నుండి పెద్ద సంఖ్యలో భక్తులు అమ్మవారి కళ్యాణాన్ని తిలకించేందుకు వచ్చారు. మంత్రి తలసాని శ్రీనివాస్ యాదవ్ పర్యవేక్షణలో భక్తులు ఎలాంటి అసౌకర్యానికి గురికాకుండా వివిధ ప్రభుత్వ శాఖల ఆధ్వర్యంలో అన్ని ఏర్పాట్లు చేయడం జరిగింది. అమ్మవారి కళ్యాణం లో ప్రభుత్వ ప్రధాన కార్యదర్శి శాంతి కుమారి, మేయర్ విజయలక్ష్మి, డిప్యూటీ మేయర్ మోతే శ్రీలత రెడ్డి, దేవాదాయ శాఖ కమిషనర్ అనిల్ కుమార్, కార్పొరేటర్ లు కొలన్ లక్ష్మి బాల్ రెడ్డి, మహేశ్వరి, మాజీ కార్పొరేటర్ నామన శేషుకుమారి తదితరులు పాల్గొన్నారు.

  

5 రోజులుగా నల్ల నీళ్లు రావటంలేదు--- యూత్ కాంగ్రెస్ ఆధ్వర్యంలో నిరసన

ఈరోజు జమ్మికుంట పట్టణంలోని కొత్తపల్లి లో గల ఇల్లంతకుంట క్రాస్ రోడ్ వద్ద గత 5 రోజులుగా నల్ల నీళ్లు రాక కాలి బిందెలతో యూత్ కాంగ్రెస్ ఆధ్వర్యంలో నిరసన.

జమ్మికుంట పట్టణ మున్సిపాలిటీ పరిధిలో గల కొత్తపల్లిలోని ఐదు వార్డులలో మంచినీటి సమస్యతో గత ఐదు రోజులుగా నల్ల నీళ్లు రాకపోవడంతో మహిళలు యూత్ కాంగ్రెస్ ఆధ్వర్యంలో ఖాళి బిందెలతో నిరసన  తెలిపారు. ఈ కార్యక్రమాన్ని ఉద్దేశించి కాళీ బిందెలతో మహిళలు మాట్లాడుతూ గత ఐదు రోజులుగా కొత్తపల్లి ప్రాంతంలో నిత్యావసర నల్ల నీరు రాక అనేక అవస్థలు పడుతున్న పట్టించుకునే నాధుడు లేడని మహిళలు ఆగ్రహం వ్యక్తం చేశారు, పోలీసులు జోక్యం చేసుకొని  అందర్నీ ఇండ్లకు తరలించారు. ఈ కార్యక్రమంలో యూత్ కాంగ్రెస్ హుజురాబాద్ నియోజకవర్గం ఉపాధ్యక్షులు సజ్జాద్ మొహమ్మద్ , కాంగ్రెస్ సీనియర్ నాయకులు సతీష్ రెడ్డి , రంజిత్ రెడ్డి , బాధిత మహిళలు బోగా లలిత , రమా, రాజేశ్వరి , రబ్బాన , సుందరమ్మ , శ్రీమతి , సరూప, షబానా, కళ్యాణి , రాణి, తార , బబ్బి , సల్మాన్ , అరుణ్ తదితరులు పాల్గొన్నారు

 బాలుడి హత్యలో దోషులను కఠినంగా శిక్షిస్తాం... మంత్రి తలసాని శ్రీనివాస్ యాదవ్..

సనత్నగర్లో దారుణం వెలుగుచూసింది. అల్లావుద్దీన్‌ కోటి ఏరియాలో గురువారం ఏనిమిదేళ్ల బాలుడు అబ్దుల్‌ వహీద్‌ అనుమానాస్పద స్థితిలో మృతిచెందాడు. బాలుడి మృతదేహం సమీపంలోని ఓ నాలాలో గుర్తించారు. అయితే అమావాస్య రోజున బాలుడిని ఓ హిజ్రా నరబలి ఇచ్చిన్నట్లుగా స్థానికులు ఆరోపిస్తున్నారు.

వివరాలు.. నాలుగో తరగతి చదువుతున్న అబ్దుల్‌ వహీద్‌ (8) గురువారం సాయంత్రం నమాజ్‌ చేయడానికి వెళ్లి తప్పిపోయాడు. అయితే రాత్రి అవుతున్న బాలుడి ఇంటికి చేరుకోకపోవడంతో తల్లిదండ్రులు చుట్టుపక్కల ప్రాంతాల్లో వెతికారు. అనంతరం సనత్‌నగర్‌ పోలీసులకు ఫిర్యాదు చేశారు. అనంతరం రాత్రి 8.30 గంటలకు బకెట్‌లో కుక్కి ఉన్న బాలుడి మృతదేహాన్ని జింకలవాడ నాలాలో స్థానికులు గుర్తించారు. దీంతో అక్కడికి చేరుకున్న పోలీసులు మృతదేహాన్ని నాలా నుంచి వెలికితీశారు. 

కాగా వహీద్‌ ఇంటి పక్కనే ఉంటున్న ఇమ్రాన్‌ అనే మహిళ(హిజ్రా).. బాలుడిని మజీద్‌ నుంచి నేరుగా తనతో తీసుకెళ్లిన్నట్లు స్థానికులు ఆరోపిస్తున్నారు.  బాలుడిని చంపి ఓ బస్తాలో వేసుకొని ఆటోలో తీసుకువెళ్లిన్నట్లు చెబుతున్నారు. ఆటోలో మృతదేహాన్ని తీసుకువెళ్లిన దృశ్యాలు సీసీటీవీ ఫుటేజీలో రికార్డు అవ్వడంతో స్థానికులు ఆటో డ్రైవర్‌ను పట్టుకొని చితకబాదారు. హిజ్రా ఇంటిపై బాలుడి బంధువులతోపాటు స్థానికులు దాడికి పాల్పడ్డారు. ఇంటిని పూర్తిగా ధ్వంసం చేశారు. దీంతో అక్కడ ఉద్రిక్త పరిస్థితులు నెలకొన్నాయి.  
విషయం తెలుసుకున్న పోలీసులు సంఘటన స్థలానాకి చేరుకుని పరిస్థితిని ఆదుపులోకి తీసుకువచ్చారు. ఈ ఘటనపై కేసు నమోదు చేసుకుని పోలీసులు దర్యాప్తు చేస్తున్నారు. నరబలి ఇచ్చిన్నట్లుగా అనుమానిస్తున్న మహిళను పోలీసులు అదుపులోకి తీసుకున్నారు. అయితే బాలుడి మృతికి హిజ్రాయే కారణమా? మరే ఇతర కారణాలేమైనా ఉన్నాయా? అన్న కోణంలో పోలీసులు విచారణ చేస్తున్నారు.

సనత్ నగర్ బాలుడి మృతి ఘటనపై మంత్రి తలసాని శ్రీనివాస్‌ యాదవ్‌ స్పందించారు. ఎనిమిదేళ్ల బాలుడు వహీద్‌ హత్యకు గురువ్వడం చాలా బాధాకరమని విచారం వ్యక్తం చేశారు. విషయం తెలుసుకున్న వెంటనే పోలీసు అధికారులతో మాట్లాడినట్లు తెలిపారు. దోషులు ఎంతటి వారైనా చట్టపరంగా కఠినంగా చర్యలు తీసుకుంటామని పేర్కొన్నారు. బాధిత కుటుంబానికి అండగా ఉంటామని భరోసా ఇచ్చారు.

 

  

శ్రీ సీతా రామచంద్ర స్వామి ఆలయాన్ని ఎంతో అద్భుతంగా  తీర్చిదిద్దాలి---- పశుసంవర్ధక, మత్స్య, పాడి పరిశ్రమల అభివృద్ధి, సినిమాటోగ్రఫీ శాఖల మంత్రి తలసాని శ్రీనివాస్ యాదవ్

 

ముషీరాబాద్ చౌరస్తా గల శ్రీ సీతా రామచంద్ర స్వామి ఆలయాన్ని ఎంతో అద్భుతంగా  తీర్చిదిద్దాలని రాష్ట్ర పశుసంవర్ధక, మత్స్య, పాడి పరిశ్రమల అభివృద్ధి, సినిమాటోగ్రఫీ శాఖల మంత్రి తలసాని శ్రీనివాస్ యాదవ్ అధికారులను ఆదేశించారు. గత నెలలో శ్రీ రామనవమి సందర్భంగా మంత్రి  శ్రీనివాస్ యాదవ్ ఈ సీతా రామచంద్ర స్వామి ఆలయాన్ని దర్శించుకొని పూజలు నిర్వహించారు. ప్రధాన రహదారి వెంట ఉన్న ఈ ఆలయాన్ని అభివృద్ధి చేసి ఆలయానికి వచ్చే భక్తులకు అన్ని రకాల సౌకర్యాలు కల్పిస్తామని హామీ ఇచ్చారు. ఆ హామీ అమలులో భాగంగా మంగళవారం వెస్ట్ మారేడ్ పల్లి లోని తన నివాసంలో దేవాదాయశాఖ అధికారులతో ఆలయ అభివృద్ధి పనులపై సమీక్షించారు. ప్రస్తుతం ఆలయం కు 3200 గజాల స్థలం ఉన్నదని, దానిని  పరిగణలోకి తీసుకొని సీతారాములు, ఆంజనేయ స్వామి ఆలయాల నిర్మాణానికి, రోడ్ వైపు షాప్స్ నిర్మాణం చేపట్టే విధంగా ప్రణాళికలు రూపొందించాలని మంత్రి ఆదేశించారు. ఆలయానికి ఆనుకొని ఉన్న కొంత ప్రయివేటు భూమిని కొనుగోలు చేసి అభివృద్ధి పనులు చేపట్టేందుకు చర్యలు తీసుకోవాలని చెప్పారు. దేవాదాయ శాఖ ఇంజనీరింగ్ అధికారులు, స్ధాపతి బుధవారం ఆలయాన్ని సందర్శించి అభివృద్ధి పనులకు సంబంధించిన ప్రతిపాదనలను సిద్ధం చేయాలని ఆదేశించారు. త్వరలోనే మంత్రి, దేవాదాయ శాఖ కమిషనర్ లతో కలిసి ఆలయ పునర్నిర్మాణ, అభివృద్ధి పనులు ప్రారంభించాలని సమావేశంలో నిర్ణయించారు. ఆలయ అభివృద్ధి పనులు పూర్తయిన తర్వాత ప్రస్తుతం ఉన్న షాప్స్ నిర్వాహకులకే ఇచ్చే విధంగా అగ్రిమెంట్ చేసుకోవాలని అధికారులను మంత్రి ఆదేశించారు. ఆలయ అభివృద్ధికి సహకరిస్తున్న మంత్రికి ఆలయ కమిటీ సభ్యులు, షాప్స్ నిర్వహకులు కృతజ్ఞతలు తెలిపారు. ఈ సమావేశంలో కార్పొరేటర్ హేమలత లక్ష్మీపతి, పద్మారావు నగర్ BRS పార్టీ ఇంచార్జి గుర్రం పవన్ కుమార్ గౌడ్, దేవాదాయ శాఖ డిప్యూటీ కమిషనర్ రామకృష్ణ, అసిస్టెంట్ కమిషనర్ కృష్ణ, ఆలయ EO రాజేష్ తదితరులు పాల్గొన్నారు.

 

యువత చేతిలోనే కర్ణాటక అధికార పీఠం!

 

మే 10న కర్ణాటక అసెంబ్లీ ఎన్నికలు జరగనుండగా.. మే 13న ఫలితాలు వెలువడనున్నాయి. రాష్ట్రంలో 5.21 కోట్ల మంది ఓటర్లు ఉన్నారని ప్రధాన ఎన్నికల కమిషనర్ రాజీవ్ కుమార్ తెలిపారు.

ఇందులో పురుష ఓటర్ల సంఖ్య 2.6 కోట్లు కాగా, మహిళా ఓటర్ల సంఖ్య 2.5 కోట్లు. మొత్తం 224 అసెంబ్లీ నియోజకవర్గాలకు ఒకే ద‌శ‌లో ఎన్నికలు జరగనున్నాయి. నేటి (మార్చి 29) నుంచి ఎన్నికల ప్రవర్తనా నియమావళి(ఎన్నిక‌ల కోడ్‌) అమలు కానుంది, బెంగళూరు సిటీ జిల్లాలో ఏడు అసెంబ్లీ నియోజకవర్గాలు ఉన్నాయి. అవి అనేకల్, బెంగళూరు సౌత్, యశవంతపూర్, దాసరహళ్లి, బ్యాటరాయణపూర్, మహదేవ్‌పూర్ మరియు యలహంక్. ఈ అన్ని అసెంబ్లీ నియోజకవర్గాలతో సహా యువ ఓటర్ల సంఖ్య పెరిగింది, గత యువ ఓటర్లతో పోలిస్తే ఈసారి యువ ఓటర్ల సంఖ్య సగానికిపైగా పెరిగింది బెంగళూరు నగర ఎన్నికల జిల్లాలో యువత ఓటరు నమోదులో 49 శాతం పెరుగుదల నమోదైంది. ఈ మేరకు ఎన్నికల సంఘం అధికారిక సమాచారం ఇచ్చింది బెంగళూరులో గతంలో 54,000 మంది ఉన్న యువ ఓటర్ల సంఖ్య ఇప్పుడు 1.1 లక్షలు దాటిందని బెంగళూరు నగర్ జిల్లా పంచాయతీ చీఫ్ ఎగ్జిక్యూటివ్ ఆఫీసర్ సంగప్ప తెలిపారు ఇక యువతను మైండ్ లో పెట్టుకొనే రాజకీయా పార్టీలు తమదైన శైలిలో హామిల వర్షం కురిపించాయి. కర్ణాటకలో తమ పార్టీ అధికారంలోకి వస్తే డిగ్రీ పూర్తి చేసిన నిరుద్యోగ యువతకు రూ.3 వేలు అందిస్తామని పార్టీ హామీ ఇచ్చింది. అలాగే డిప్లొమా చదివి, నిరుద్యోగులుగా ఉన్న యువతకు రూ.1500 అందిస్తామని చెప్పింది

 

2018లో జరిగిన అసెంబ్లీ ఎన్నికల్లో బీజేపీకి 104 స్థానాలు రాగా.. కాంగ్రెస్‌కు 78 సీట్లు, జేడీఎస్‌కు 37 సీట్లు వచ్చాయి. అలాగే కర్ణాటక ప్రజ్ఞావంత జనతా పార్టీ, బహుజన్ సమాజ్ వాదీ పార్టీ చెరో సీటు గెలుచుకోగా.. ఒకరు ఇండిపెండెంట్ అభ్యర్థి విజయం సాధించారు. ఎన్నికల్లో బీజేపీ ఎక్కువ స్థానాలను గెలుచుకుని అది పెద్ద పార్టీగా అవతరించగా.. జేడీఎస్, కాంగ్రెస్ కలిసి ప్రభుత్వాన్ని ఏర్పాటు చేశాయి. దీంతో జేడీఎస్ అధ్యక్షడు కుమారస్వామి సీఎంగా బాధ్యతలు చేపట్టారు. ఆ తర్వాత జరిగిన పరిణామాల్లో కుమారస్వామి పదవిని కోల్పోవాల్సి వచ్చింది.

కొంతమంది కాంగ్రెస్, జేడీఎస్ ఎమ్మెల్యేలు బీజేపీ వైపు మళ్లడంతో కాంగ్రెస్-జేడీఎస్ సంకీర్ణ ప్రభుత్వం బలం కోల్పోయింది. ప్రభుత్వం కూలిపోవడంతో కుమారస్వామి సీఎం పదవికి రాజీనామా చేశారు. ఆ తర్వాత బీజేపీ ప్రభుత్వం కర్ణాటకలో అధికారంలోకి వచ్చింది. అయితే బీజేపీ ప్రభుత్వంలో అవినీతి విపరీతంగా జరుగుతుందనే ఆరోపణలు ప్రతిపక్ష కాంగ్రెస్, జేడీఎస్ నుంచి గట్టిగా వినిపిస్తున్నాయి. దీంతో కర్ణాటకలో బీజేపీ ప్రభుత్వంపై తీవ్ర వ్యతిరేకత ప్రజల్లో ఉన్నట్లు రాజకీయ విశ్లేషకులు అంచనా వేస్తున్నారు. ఇలాంటి తరుణంలో లోక్‌సభ ఎన్నికలకు ముందు జరగనున్న కర్ణాటక ఎన్నికలు దేశవ్యాప్తంగా ఆసక్తికరంగా మారాయి.

 

224 అసెంబ్లీ స్థానాలు ఉన్న కర్నాటకలో బీజేపీకి 119 మంది, కాంగ్రెస్ కు 75 మంది, జేడీఎస్ కు 28 మంది ఎమ్మెల్యేలు ఉన్నారు. బీజేపీ ఈసారి 150 సీట్లను టార్గెట్ గా పెట్టుకున్నది. ముఖ్యమంత్రి బసవరాజు బొమ్మై సారథ్యంలో ఎన్నికలు జరగనున్నాయి. మాజీ సీఎం, లింగాయత్ కీలక నేత బీఎస్ యెడ్యూరప్ప 2024లోను మోడీని మూడోసారి ప్రధాని చేసేందుకు కృషి చేస్తానని చెప్పారు. యెడ్యూరప్ప జూలై 2021 వరకు సీఎంగా ఉన్నారు. ఆ తర్వాత బొమ్మై సీఎం అయ్యారు. ఈసారి యెడ్డీ పోటీ చేసే అవకాశాలు తక్కువ. ఆయన తనయుడు విజయేంద్ర శిఖారిపుర నియోజకవర్గం నుండి పోటీ చేయవచ్చునని భావిస్తున్నారు. అలాగే, బాగా పని చేయని ఎమ్మెల్యేలకు బీజేపీ టిక్కెట్ నిరాకరించే అవకాశం ఉంది. నరేంద్ర మోడీ ఫేస్ ను ఈ ఎన్నికల్లోను ఉపయోగించుకోనున్నారు. ఇటీవల 4 శాతం ముస్లీం రిజర్వేషన్ ను తొలగించి వొక్కలింగ, లింగాయత్ లకు కేటాయించింది బీజేపీ. ఇది ఈ పార్టీకి ప్రయోజనం చేకూర్చే అవకాశాలు ఉన్నాయి.

రిజర్వేషన్ పునరుద్ధరిస్తామని కాంగ్రెస్

ముస్లీంలకు తొలగించిన నాలుగు శాతం రిజర్వేషన్ ను తాము అధికారంలోకి వస్తే పునరుద్ధరిస్తామని కాంగ్రెస్ మైనార్టీ ఓట్లను ఆకర్షించే ప్రయత్నాలు అప్పుడే ప్రారంభించింది. మాజీ సీఎం సిద్ధరామయ్యను ముఖ్యమంత్రి అభ్యర్థిగా ఫోకస్ చేస్తున్నారు. కర్నాటక కాంగ్రెస్ అధ్యక్షులు డీకే శివకుమార్ కు కూడా ప్రాధాన్యత ఇస్తోంది పార్టీ. చాలా రాష్ట్రాల్లో బీజేపీ దరిదాపుల్లోకి రాలేకపోతోంది కాంగ్రెస్. కానీ కర్నాటకలో మాత్రం టఫ్ పైట్ ఇస్తోంది.

జేడీఎస్ కింగ్ మేకర్ ఆశలు

జేడీఎస్ మరోసారి కింగ్ మేకర్ లేదా కింగ్ ఆశలు పెట్టుకున్నది. బీజేపీ, కాంగ్రెస్ పార్టీలకు మెజార్టీ రాకుంటే జేడీఎస్ కు డిమాండ్ పెరుగుతుంది. పాత మైసురు ప్రాంతంతో పాటు ఇతర ప్రాంతాల్లోను విస్తరించేందుకు ప్రయత్నాలు చేస్తోంది.

 

 

 

  హనీ ట్రాప్.. ఈ ఒక్క పరీక్షకేనా!? లేందంటే అన్ని పరీక్షలకా!??

తెలంగాణ రాష్ట్ర పబ్లిక్ సర్వీస్ కమిషన్ నిర్వహించాల్సిన టౌన్ ప్లానింగ్ బిల్డింగ్ ఓవర్సీర్ పరీక్ష వాయిదా పడిన సంగతి తెలిసిందే. సంస్థకు చెందిన కీలకమైన కంప్యూటర్ హ్యాకింగ్ కు గురైందని, అందుకే పరీక్షను వాయిదావేశామని అధికారులు ప్రకటించారు. అయితే ఈ పరీక్ష పత్రం లీక్ వెనక జరిగింది హ్యాకింగ్ కాదు, హనీ ట్రాప్.

అవును.. ఓ అమ్మాయి మత్తులో పడి స్వయంగా టీఎస్పీఎస్సీ ఉద్యోగి ఈ పరీక్ష పత్రాన్ని లీక్ చేశాడు. ఈ విషయాన్ని గుర్తించిన పోలీసులు, సదరు ఉద్యోగితో పాటు, మరో ఏడుగుర్ని అదుపులోకి తీసుకున్నారు.

ఇంతకీ ఏం జరిగింది..

లెక్కప్రకారం, ఈరోజు టౌన్ ప్లానింగ్ పోస్టుల భర్తీకి పరీక్ష జరగాల్సి ఉంది. ఓఎంఆర్ పద్ధతిలో రాతపరీక్ష నిర్వహించేందుకు ప్రశ్నాపత్రం సిద్ధంచేసి ఉంచింది టీఎస్పీఎస్సీ. అయితే ఆఖరి నిమిషంలో కంప్యూటర్ నుంచి సమాచారం బయటకెళ్లినట్టు గుర్తించారు. దీంతో వెంటనే టౌన్ ప్లానింగ్ తో పాటు, వెటర్నరీ అసిస్టెంట్ సర్జన్ పోస్టులకు చెందిన రాతపరీక్షల్ని వాయిదా వేశారు, అంతకంటే ముందు పోలీసులకు ఫిర్యాదు చేశారు.

రంగంలోకి దిగిన పోలీసులు ప్రవీణ్ అనే వ్యక్తిని అరెస్ట్ చేశారు. స్టేట్ పబ్లిక్ సర్వీస్ కమిషన్ సెక్రటరీ వద్ద పీఏగా చేస్తున్న ప్రవీణ్ ఈ పని చేసినట్టు గుర్తించారు. కొన్ని రోజులుగా ఓ యువతి, అతడితో చనువుగా ఉంటోంది. ప్రవీణ్ ను కలిసేందుకు పలుమార్లు కార్యాలయానికి కూడా వచ్చింది.

ఆమె కోరిక మేరకు, ప్రశ్నాపత్రాన్ని బయటకు తీసుకొచ్చాడు ప్రవీణ్. అలా హనీ ట్రాప్ మూలంగా ఈ పరీక్ష పత్రం లీక్ అయింది. వేలాది మంది మంది అభ్యర్థుల జీవితాల్ని ప్రశ్నార్థకం చేసింది.

అయితే అత్యంత కట్టుదిట్టమైన పాస్ వర్డ్స్ తో ఉండే ఆ కంప్యూటర్ ను ప్రవీణ్ ఎలా తెరిచాడనేది పోలీసులకు అంతుచిక్కడం లేదు. ఆ పాస్ వర్డ్స్ అతడికి ఎలా తెలిశాయి, కంప్యూటర్ ఓపెన్ చేసిన తర్వాత ప్రశ్నాపత్రాన్ని అతడు ఎలా ప్రింట్ చేశాడు (ప్రింట్ ఆప్షన్ లేదు) అనేది పోలీసులు కనిబెట్టాల్సి ఉంది. దీంతో పాటు, లీక్ చేసిన క్వశ్చన్ పేపర్ ను అతడు ఎంతమందికి అందించాడనే కోణంలో కూడా పోలీసులు విచారణ జరుపుతున్నారు.

ప్రస్తుతానికి ఈ కేసులో ప్రవీణ్ తో పాటు మరో ఏడుగుర్ని అదుపులోకి తీసుకున్నారు పోలీసులు. హ్యాకింగ్ అనుకుంటే, హనీ ట్రాప్ గా మారిన ఈ కేసు ఇంకెన్ని మలుపులు తిరుగుతుందో చూడాలి.

ఇది ఎలా ఉంటె తెలంగాణ రాష్ట్ర పబ్లిక్ సర్వీస్ కమిషన్ నుండి వందల సంఖ్యలో ఉద్యోగాల నోటిఫికేషన్ వెలువడిన సంగతి తెలిసిందే , ఇప్పుడే ఈ హాని ట్రాప్ జరిగిందా లేదంటే ఇప్పటివరకు జరిగిన గ్రూప్స్ , డి. ఓ.ఏ .ఓ ఇంకా జరిగిన పరీక్షలలో కూడా ఇదేవిధంగా జరగలేదని ఏంటి నమ్మకం, ఒక విదంగా చూస్తే ఆదివారం జరిగే పరిక్షల కన్నా ముందు జరిగిన పరీక్షలు చాల పెద్దవి కావటం విద్యారులలో ఆందోళన కలిగిస్తుంది, ఒక PA కు అక్కడ ఆన్న సమాచారం అంత ఈజీగా దొరికింది అంటేనే ఎదో మతలబు లాగా ఉంది దీనిపై ప్రభుత్వం కూడా సీరియస్ గా తీసుకోని సిట్టింగ్ జడ్జితో విచారణ జరిపించకపోతే విద్యారులు ఆందోళన చేపట్టే అవకాశం ఉంది, ఏది ఏమయినా విచారణ జరుగుతుంది కాబట్టి చూద్దాం ఎం చెపుతారో అధికారులు